Siaha-Ah Secretary, Home and DM&R-In DEOC Leh District Jail Tlawh

Siaha; the 8th July, 2020: Pi Lalbiaksangi, Secretary to the Government of Mizoram, Home leh Disaster Management & Rehabilitation Department changtu chuan tukin zing dar 7:00am khan District Emergency Operation Centre (DEOC), Siaha leh District Jail, Siaha te a tlawh. Secretary hi Pu Bhupesh Chaudhary, IAS, Deputy Commissioner leh DC office-a official-te’n an tawiawm a ni.

Secretary hian DEOC a tlawh hmasa a, rikrum thila hman tur bungraw hrang hrangte a en chiang a, Deputy Commissioner-in mamawhte a lo thlen nghal a ni.

District Jail a tlawhnaah hian thawktute nen an inkawm ho a, he inkawm hona hi Pu Zosangliana, Superintendent of Jail-in a kaihruai a. Pi Lalbiaksangi chuan, thawktute chu an hna thawhnaah danin a sawi angin rinawm leh taima taka thawk turin a fuih a, jail tang mekte’n nun thar an neih theih nana enkawl turin a ngen bawk a ni.

Secretary hian jail chhunga awmte dinhmun en nghalin, danin an chunga ro a rel angin thu awih taka awm turin a fuih a, jail chhunga awmte’n mamawh an thlen te chu a tul anga a bawhzui tur thu hrilhin, an chawhmeh tur sa leina atan pawisa a pe hlawm bawk.

Secretary hi jail-a awmte’n an thil siam in lem nalh tak an lo hlan bawk a ni.

ISSUED BY: INFORMATION & PUBLIC RELATIONS OFFICE
SIAHA DISTRICT:SIAHA