Siaha DC in Ambulance Changkang tak leh Smart Class Room 12 siamna tur Gail ataning ₹ 55 Lakh a dil chhuak

Tarchhuah NI : 14/11/2019

Siaha; November ni 14: Nimin khan New Delhi-ah Siaha District Bawrhsap Pu Bhupesh Chaudhary IAS leh GAIL( Gas Authority of India Limited) Executive Director(CSR),Pu Anoop Gupta leh Pu Alok Sinha, Vice President,Extramarks Foundation ten CSR(Corporate Social Responsibility) atanga Siaha District a Medical leh Sawrkar Sikul hmasawnna tur Ambulance changkang tak leh Smart Class Room 12 siamna tur chungchanga Memorandum of Understanding(MoU) an ziak.

GAIL hian khawvel huapa damdawi lam(Pharmaceutical & Biotechnology) company lian Wockhardt Limited kaltlangin Ambulance changkang tak cheng ₹ 35 lakh man District Hospital,Siaha hi a rawn pe dawn a ni. GAIL bawk hian khawvel huapa zirna lam (Educational Technology) company lar Extramarks Foundation kal tlangin Siaha District a Sawrkar School ten zirlai naupangte an zirtirna kawnga hma an sawn theih nan Smart Class Room 12 ₹ 20 lakh sengin an rawn din dawn bawk a ni.

Siaha District Bawrhsap Pu Bhupesh Chaudhary leh a thawhpui officer te chuan India rama Company lian hrang hrang te hnenah Siaha District hmasawn nan hian an CSR atangin vehbur a khawn kual nasa a, hlawhtlinna dang pawh hmu leh thuai an inbeisei hle a ni.

Issued by – Information and Public Relations Office, Siaha District; Siaha