India Independence Day-2018 Ropui takin Siaha-ah lawm a ni.

Publish Date : 16/08/2018

Siaha, August 15 : Kumin 2018 India Independence Day vawi 72-na, India in British sawrkar awpbehna hnuai atanga a indanna Ni champha chu ropui leh urhsun takin Pu H. Rohluna, Minister i/c School Education etc., Government of Mizoram hovin District Playground, Siaha-ah lawm a ni.

Iday - 2018
Independence Day-2018 at Siaha

Vawiin Independence Day vawi 72 lawmna a khuallian Pu H. Rohluna chuan thu sawiin, Mizoram Sawrkar Flagship Programme New Land Use Policy (NLUP) chuan ei leh bar zawnna kawngah chhungkaw tam tak hmasawnna a thlen chho mek zel a, eizawnna ngelnghet leh rintlak siamsakin, tlangram loneih pawhin a tlakhniam phah a ni, a ti a. Mizoram sawrkar in New Economic Development Policy (NEDP) pawh kum 2016 atangin a kalpui tan a, NEDP hnuaiah kum 2016-2019 chhunga hmalakna turin cheng vaibelchhe 2000 (sanghnih) dah a ni a, hmasawnna ruhrel thar din belh nan leh a awmsa thawmthat leh enkawl zui nan 85% chu hman mek zel a ni. Hmasawnna ruhrel pawimawh tak kawlphetha siam chhuahnaah Mizoram sawrkar in nasa takin tan ala a, Tuirial Hydro Electric Project chu zawhfel tawh niin, Prime Minister Pu Narendra Modi in December Ni 16, 2017 khan a hawng tawh a ni, a ti. Tuivai HEP 210MW thawhna turin NEEPCO nen thawhhona thuthlung ziah tawh a ni tiin, Mizoram Solar Power Policy, 2017 hmangin Nizung chakna hmanga Power siam chhuak turin chak taka hmalakna kalpui mek a ni, a ti bawk.

Siaha
with DC Siaha & Chief Guest

Zirna tih hmasawn zel hi sawrkar in a ngaipawimawh hle a, Department leh School Building thar hmun hrang hranga sak nan leh thawmthat nan SPA, SCA, NEDP, NABARD leh Article 275(1) atangte in cheng vaibelchhe tam tak hmuh tawh a ni a. DIET 6-ah Institutional Building thar sak zawh a ni tawh a, Siaha-ah pawh DIET Institutional Building thar cheng nuai 200 chuang senga sak thar chu naktuk hian ka hawng nghal dawn a ni, a ti.

MADC pawhin mipuite mamawh phuhru turin hmasawnna hna chak takin a thawk zel a, NLCPR Fund atangin cheng nuai 261.18 ve ve sengin Aizawl Luangmual leh Zotlangah Mara Boys’ leh Girls’ Student Hostel sak a ni, a ti a. MDC Hostel pawh Siahatlah-ah cheng nuai 190 senga sak mek a ni a, MADC Sub. Hqrs, Tipa-ah pawh Revenue Office cheng nuai 150 sengin a sak hna chu kalpui mek a ni, a ti bawk.

India Independence Day lawmnaah hian Parade Contingents 15 awmin, Uniform Contingents-ah 5 leh School Contingents-ah 10 te an ni a. Uniform Contingents te zingah NCC Don Bosco School te chuan lawmman pakhatna an la a, pahnihna-ah MRHG te awmin, pathumna-ah MRP te an awm ve thung a ni. School Contingents atangin Foxall HSS te chuan lawmman pakhatna lain, pahnihnaah Lorrain English School te niin, ECM HSS te chuan lawmman pathumna an la ve bawk a ni. Hemi bakah hian India Independence Day lawmna pual hian Football leh Volley Ball-ahte competition buatsaih a ni a. Vawiin chawhnu dar 2:00Pm hian Final match hmuhnawm tak College vaih FC leh Siahatlah FC te chuan an khel dawn a. Football match lawmman hi khuallian in a sem nghal dawn a ni. Volleyball Men’s Final chu nimin khan khel a ni a.Reuben Volley Ball Club te chuan Southern Young Volley Ball Club te hnehin an champion a. Vawiin tlaiah Women’s Championship Final Match hi Model United Volleyball Club leh Zyhno Volleyball Club ten an khel dawn a ni. Vawiin Independence day lawmna-ah hian Election Branch , Siaha chuan SVEEP( Systematic Voters Education and Electoral Participation) Signature Campaign beihpui an thlak chu kalpui chhunzawm zelin, Khuallian pawhin a signature a pe ve a ni.

Vawiin India Independence Day lawmna pual hian CEM, MADC chuan sawm bikte pualin chawhnu dar 1:00pm hian CEM Bungalow-ah AT HOME a buatsaih dawn a ni.

Issued by  : I&PRO, Siaha

Siaha Iday