Indian Republic Day vawi 71 na Ropui takin Siaha-ah lawm a ni.

Publish Date : 27/01/2020

Siaha, January 26: Indian Republic Day Vawi-71 na chu vawiin chawhma dar 8:00Am khan Meisatla field-ah ropui leh urhsun taka lawm a ni.

He Ni lawman-ah hian Pu Bhupesh Chaudhary IAS, Deputy Commissioner, Siaha District chu khuallian a ni a, zing dar 8:00Am-ah Hnampuanzar pawtpharh in Parade Contingents ten Hnampuanzar Chibai an buk chu a chhanglet a ni. Khuallian chuan thu sawiin, Siaha district chhunga Job Card Holder 15899 te hnenah tun financial year-ah inhlawhna ni 91 thawh ni tawhin, PMAY-G, PMKSY, MzSRLM leh DDU-GKY kaltlangin District Rural Development Agency, Siaha hnuaiah hmasawnna hna tam tak thawh a ni tawh a, hna kallai leh hmabak tam tak buaipui mek a ni, a ti a. National Highway-54, Kaochao to Tipa kawngpui sial tura zangnadawmna pawh ram neihtu mi 1120 te hnenah 1st phase pek vek tawh niin, 2nd phase pawh thlathar February a sem leh hman tum a ni, tiin, hemi atan hian 92.9 crore lai senral tura ngai a ni, a ti bawk.

Kaochao-Phura-Tokalo (KPT) road 66kms a thui sial mek pawh 20kms lai zawh tawh a ni a, heng kawngpui paltlanga ram a tihchhiat ram 163 te hnenah zangnadawmna Rs.9.2 crore lai semral a ni tawh bawk. Zyhno-Mawhro-Chapi road-ah pawh ramneitu mi 170 te hnenah Rs.11.3crore lai pektlak tawh an ni a, a bak pawh chak taka tihfel thuai beisei a ni, a ti bawk. Tipa-Lôpu-Laki road 70kms a thui atangin 40-57 kms chhunga ram neitu 67 te hnenah Rs.7.1crore lai semral tawh a ni bawk. Deputy Commissioner’s Office, Siaha hmalaknain, hmun hrang hrang atangin Corporate Social Responsibility (CSR) hmuh atangin 12 smart classroom tur School thlan bik 6 ah 22 lakhs sengin siam zawh tawh a ni a, he sumte hi Gas Authority of India Limited (GAIL) leh Extramarks Foundation te bultum a ni.

Tin, DC’s Office hmalaknain, zirna lama hmasawnna chikhat atan Kawng Kawhmuhtu’ pawh chak taka kalpui niin, zirlai naupang leh zirtirtu ten an hlawkpui hle. He project-ah hian lectures hi English, Science leh Mathematics subject bikah record siam a ni a, School 10 hnena LED TV athlawna sem hmangte a en a, zir thei turin hmalak a ni, a ti bawk. Hemi hnuaiah hian School 10 te hnenah Library hawnsak tawh a ni a, an mamawh tur hrang hrangte pawh pek kim vek an ni a, cheng nuai Rs.5 theuh Samagra Shiksha Abhiyan leh CSR kan partner te hnen atanga kan hmuhte hmanga pek a ni bawk, a ti. Anganwadi Centres 126 te tihhmasawnna leh thawmthatna tur pawh BPCL te hnen atangin CSR 47 lakhs lai hmuh a ni a, Anganwadi te mamawh hrang hrang ngaituahsak an ni dawn a ni, tiin. Mobile Medical Unit (Ambulance) pawh GAIL leh Wockhardt Foundation ten an CSR atangin Rs. 35 lakhs man lai min pe tawh bawk a ni, a ti. Siaha khawpui faina lama hma kan sawn zawk thei nan Bawhhlawh paina motor pahnih bakah bawlhhlawh sawngbawlna (Lei tha a siam lehna) pawh kan neih tawh a, heng te hi MADC kuta hlan vek tawh a ni, a ti bawk. Zyhno khuaah Chilli Processing Unit pawh RKVY, MGNREGS bakah CSR kan hmuh atangin kan din tawh bawk.

Beti Bachao Beti Padhao (BBBP) scheme pawh district bawrhsap leh NGOs te puinain chak taka kalpui a ni. Tin, Mizoram a pakhatna ni turin Siahaah One Stop Centre September, 2019 atanga kalpui tawh a ni bawk a, Sub-Centre pawh Kaochao, Tipi Ferry leh Vahia khuaah te MNREGA hnuai atang din a ni tawh bawk a ni, a ti.

He Ni lawmna-ah hian Parade Contingents 14 awmin, Uniform Contingents-ah pakhatna Students Police Cadet, Government Higher Sec. School niin, pahnihna-ah NCC, Don Bosco School leh pathumna-ah Mizoram Home Guard te an ni a. School Contingents-ah pakhatna chu Government Siaha High School te niin, pahnihna-ah Don Bosco School te leh pathumna-ah New Colony High School te an ni. Indian Republic Day lawmna pual hian lawmman dang semna neih nghal niin, BBBP Girl Achiever Award siamin Chawimawina thuziak leh tangkafai Rs.3000 theuh an hlan hlawm a ni.Chung te chu: Footballer heng – K. Ngôpawti, Esther Lalchhuanawmi, Sanra, T. Ngôri, Benita Solo leh Vabeisôngia te bakah Boxer L. Vanlalduati te hnenah pek a ni a. National Umpire Accredited Pi B. Lalruatpuii hnenah chawimawina hlan a ni bawk.

Best performing Offices-ah Chief Medical Officer’s Office, LAD, MADC leh District Child Protection Unit te hnenah chawimawina thuziak hlan a ni bawk. Best Performance NGOs Leader-ah Pi P. Chaki, MCHP(H) president chu thlan a ni a, Chawimawina hlan nghal a ni. Pala khua chu Cleaness Village a thlan niin, DC Award chu Meisatla VC-I ten an dawng bawk a ni. He lawmman te hi khuallian Pu Bhupesh Chaudhary IAS chuan a sem nghal a ni.

Issued by : I&PRO,Siaha