MoS Dr.K. BEICHHUA IN ZYHNO KHUA KUM 100 TLIN LAWMNA PROGRAMME A HMANPUI

Tarchhuah NI : 19/12/2019

Siaha; December ni 19: Dr.K.Beichhua, Hon’ble Minister of State, for AH&Vety,SWD etc. chuan Zyhno Centenary lawmna programme-ah Khuallian niin, Zyhno khuaah vawiin ni lengin Centenary lawmna programme a chhim a. Pu KT.Rokhaw Bialtu MLA pawhin khualzahawm niin vawiin programme hi a chhim ve bawk.

Zyhno khua chuan an Kum 100 tlin lawmna pual hian Centenary Gate khaw luh dawnah an siam a, kawtthler lun lai berah Centenary Lungphun an din bawk a ni. Hei bakah hian Centenary Souvenir changtlung zet an buatsaih bawk a ni.

Zyhno khua hi Siaha khawpui atangin 85Km a hla a awm a ni a, Tipa atanga 13Km hla lekah awmin, NH54 in a paltlang a ni. Tipa khua atanga kal chuan Siaha district khawthlang leh chhak lam kalna hi Zyhno khua atang hian a peng a, khawthlang leh khawchhak lam infinna khua te pawh a ti thei awm e. Bristish in min awplai hunah khan chhimlama khaw pawimawh ber leh lian ber te zing a mi a ni a. Kum 1951 thleng pawh khan , Census a alan dan chuan, tuna Siaha leh Lawngtlai District huam chhunga khawpui ber a la ni. Tunah pawh hian Siaha District chhunga ram ngaw nei tha ber leh nei zau ber khua an la ni. Tunah hian chhungkaw 343 awmin, mi cheng te hi an vaiin 2621 an ni a, Mipa-998 leh hmeichhia-1063 an awm mek a ni.Sex ratio hi 1065 a ni.

Centenary lawmna programme-ah thu sawiin Minister chuan Zyhno Lal hi British hnuaia Chin Hills leh Lushai Hills huam chhunga Lal zawng zawng an tlawm vek lai pawh tlawm lawk lo kha a ni a. British ho pawhin khaw huaisen tih a a hriat kha in ni. Chuvangin vawiina in Centenary Lawmna thupui a tana Rinawmna in hmang pawh hi a inhmeh hle a ni; a ti. Mknister chuan huaisenna hi Rinawmna rahchhuah a ni chawk thin. Rinawmna chuan Taimakna a hringa, taimakna chuan intodelhna a hring leh a, Intodelhna chuan inrintawkna leh huaisenna a hring thin a ni.Riltam chungin a huaisen tak tak thei lo, mi dawizep an rinawm mawh viau a ni, a ti bawk.
Sawi zelin Minister chuan Rinawmna rau rau-ah pawh Pathian laka Rinawmna hi a ropui ber, Pathian laka Rinawmna chuan engkim hi a fel duak mai a ni, a ti.

Vawiin Centenary kan lawm hian Zyhno khua leh tui te rilruah mi huaisen an nih tih hi hriat nawn tir leh se. An Rinawmna chawknung thar leh se, chu chuan an huaisenna te, taimakna te, chhelhna te, inlungrualna te chawk tho lehin kawng engkimah Mara ram ti hmangthatu leh Mara ram in a thlamuanpui khua lo ni zel rawh se, tih hi ka duhsakna a ni, a ti.

Pu KT.Rokhaw, bialtu MLA pawhin thu sawina hun hmangin, Krismas dawn hun chep tak karah Minister te Nupa in ka bialchhunga Programme min lo hmanpui thei avangin, a mimal tak pawhin lawmthu ka sawi tak zet a ni, a ti.

Vawiin programme-ah hian Pu PP.Thawla, Ex-Minister in Centenary Souvenir a tlangzarh nghal bawk a ni. Centenary Lawmna programme hi naktuk thlengin an chhunzawm dawn a ni.

Vawiin programme chhimtu an tha hnem hle. Official leh Official lo te, MDC te bakah Myanmar-a khaw tam tak atang pawhin an lo chhim ve bawk a ni. Programme kar lakah hian Hnam lam te entirin, mal zai te leh thusawi hrang hrang te ngaithlak a ni bawk.

ISSUED BY:INFORMATION & PUBLIC RELATIONS OFFICE, SIAHA DISTRICT;SIAHA