SIAHA-AH CLASS-X & XII PASS THA ZUAL HMEICHHE ZIRLAI NAUPANG 11 TE CHAWIMAWI

Publish Date : 20/07/2020

Siaha ; July ni 20 –  Vawiin Chawhnu dar 1:00pm khan DC office, Siaha huaihawtin BETI BACHAO BETI PADHAO(BBBP) SCHEME atangin DC conference Hall-ah HSLC& HSSLC-2020 pass thazual hmeichhe zirlai naupang 11 te chawimawina hun hman a ni.

Vawiin programme hi Pi B. Malsawmtluangi, SDO(S) & Nodal officer BBBP chuan kaihruaiin; Pu Bhupesh Chaudhary IAS, district bawrhsap chuan khuallian niin a hmanpui.

Vawiin hmeichhe zirlai titha te chawimawina programme-ah hian fuihna thu sawiin; Pu Bhupesh chuan tuna class-X& XII in pass hi a tawpna emaw, in hahchawlh theih tihna a ni lo, inelna tualzawl zau zawkah bul intan ve chauh zawk a ni; tiin, tha thlah lova tan la zual sauh turin a chah hlawm a ni. Zirlai nu leh pa te hnenah lawmpuina thu hlan pahin fuihna thu sawiin; class-X &XII thlenga fanu lehkha thiam thei tak; college level atanga zuzi ta mai in neih loh nan in fanu te zirna kawng hi enpui u la, fuih u la, phurpui viau ang che u, a ti bawk.

Vawiin hmeichhe zirlai naupang 11 chawimawi tak te hi High school atangin 5 leh Higher secondary School atangin 6 an ni a. Vawiin hmeichhe zirlai naupang 11 chawimawi te zingah hian HSLC a topper Singokhai Chozah d/o Pu Thahe Chozah leh HSSLC a top 7th M.Beihniarili d/o Pu M.Beichi fanu te pawh an tel a ni. HSLC topper hnenah hian Chawimawina thuziak bakah Rs.8000 + BBBP Mug hlan a ni a. HSSLC Top 7th hnenah hian Chawimawina thuziak+Rs.7000+BBBP Mug pek a ni bawk.

Midang HSLC atanga chawimawi zirlai 4 te hnenah hian chawimawina thuziak+Rs.5000 + BBP Mug te hlan an ni a. HSSLC atanga chawimawi hmeichhe zirlai naupang dang 5 te hnenah hian chawimawina thuziak+Rs.6000+ BBBP Mug te hlan an ni bawk.

Vawiin Class -X&XII pass thazual chawimawina programme-ah hian zirlai naupang nu leh pa te bakah MJA member te, MTP(H) hruaitute, MSO(H) hruaitute, MCHP(H) hruaitute leh sawmbik te an tel kim hle a ni.

ISSUED BY : INFORMATION & PUBLIC RELATIONS OFFICE, SIAHA DISTRICT, SIAHA