SIAHA-AH ELECTORAL ROLL OBSERVER PU K.LALTHAWMMAWIA’N ELECTORAL ROLL BUAIPUITU (OFFICIALS) LEH POLITICAL PARTY, NGOs TE A KAWM

Siaha, November ni 23 : Pu K.Lalthawmmawia, IAS, Secretary, Government of Mizoram, DP&AR, UD&PA leh ECI hnuaia Electoral Roll Observer ni bawk chuan vawiin khan DC Conference Room Siaha-ah Special Summary Revision of Electoral Roll, 2022 chungchang sawipuiin Siaha District-a E-Roll buaipuitu Officials te bakah Political Party leh NGO hrang hrang aiawhte a kawm a ni.

Electoral Roll Observer Pu K.Lalthawmmawia chuan kalkhawm te lawmna thu sawiin mipui Sawrkar siam tura innghahna bulpui chu E-roll dik leh felfai a ni, a ti a. Roll dik leh felfai buatsaih tur chuan Official te leh Political party te bakah NGOs hruaitute’n thawhhona tha an neih a pawimawh thu a sawi a ni.
Pu K.Lalthawmmawia chuan Roll dik leh felfai buatsaih a nih theih nan Official te inpuahchahna leh ruahmanna te enpui turin Election Commission of India chuan Electoral Roll Observer a ruat thu sawiin, Roll buatsaihna kawnga pawimawh ber pakhat chu India khua leh tui roll-a thun theih tura tling (qualify) chu roll-a thun ngei tur a ni a, roll-a thun tura qualify loh chu thun loh tur a ni tiin, Mizoram chu tun thlengin India rama roll dik leh felfai buatsaihna kawngah a titha pawl an la ni zel thei chu Official te leh Party, NGOs hruaitute thawhhona rah a nih thu a sawi bawk.
Roll Observer chuan Myanmar ram buai avanga Mizoram-a raltlan thahnem tak an awm mek avangin tun tum bik hi Central Sawrkar leh Election Commission of India chuan Roll buatsaih chungchangah beng an chhi ulukin an khirh lehzual a rin thu a sawi a, hemi avang hian Roll buaipuite chu Roll kaihhnawiha form chi hrang hrang an dawn te chu fimkhur taka endik turin a chah a, endikna hun (hearing) ah party aiawh leh NGO aiawh te an tel ve a pawimawh thu a sawi a, thawhhopui-ah a sawm bawk a ni.

Pu Abraham Beirazi Khithie, Addl. DC/Dy. DEO chuan hearing neih hunah NGO aiawh a bik takin political party tin aiawh Booth Level Agent (BLA) te chu hearing neih hunah tel ve turin a sawm a, Roll dik leh felfai buatsaih a nih theih nan NGO hrang hrang hruaitute chu thawhhopui-ah a sawm a ni.

Draft Electoral Roll 2022-a a lan danin tun dinhmunah 39-Siaha (ST) AC ah voter 22,595 (Male: 10,869, Female: 11,726) an awm mek a, 40- Palak (ST) AC ah voter 19,346 (Male: 9638, Female: 9708) an awm mek a ni. Tun tum Electoral Roll buatsaih turah hian January ni 1, 2022 a India khua leh tui kum 18 tling tur tan roll-ah inthun thar a dil theih a, final electoral roll hi ECI thupek angin 15.01.2022 a puangzar/tlangzarh (publish) tura ruahman a ni.
He hunah hian Roll kaihhnawiha Party leh NGO aiawh ten hriatfiah duh an neih leh harsatna hrang hrang an tawh te chu sawiho pui niin harsatna sutkian dan tur kawng ruahman te pawh sawiho a ni.

Thutkhawmah hian Pu Kesavan R, IAS, District Election Officer, Pu Abraham Beirazi Khithie, Addl DC/Dy District Election Officer, Pi Lalnunmawii, Election Officer te bakah ERO,AERO te leh Political Party hrang hrang aiawh leh NGO hotute an tel a ni.

ISSUED BY : INFORMATION & PUBLIC RELATIONS OFFICE
SIAHA DISTRICT : SIAHA